أول لما دخلت الجامعة مكنتش حاسس بخطر لأني متعود إن اللي هيشرح هيقولي كل اللي محتاجة مش عشان أنجح بس، لأ عشان أجيب أعلى التقديرات وهلاقي نفس الإهتمام اللي شوفته من مدرسين الثانوية العامة من ملخصات ومراجعات وحل إمتحانات وكلام face 2 face في أي تفصيلة وأهم حاجة كانت الإهتمام المعنوي!
أيام الثانوية الواحد كان بيصحى وينام على كلام تحفيزي وذاكر يابني عشان مستقبلك وفراشات كتير كانت بتملى فجوة الإهتمام ونغمة الشغف الفكسانة وإن في حد خايف عليك، لما دخلت الجامعة أفتكرت الدكاترة بلا مشاعر بلا إنسانية، وكان جوايا شعور عبارة عن "أنت إزاي مش بتساعدني وتهتم بيا زي ما كان بيحصل في ثانوي انا أستحق دا منك!😭😭😭".
طبعاً الإستحقاقية الزائدة اللي كانت عندي كطالب مُدلل أثرت عليا في طلب العلم لأني كنت مستني الدكتور هو اللي يقولي أذاكر ايه وأحل ايه وأسيب ايه وعشان كدا انا مكنتش خايف لأني كنت فاكر الهدوء بتاعهم كان سببه إن مفيش حاجة مهمة أعملها غير إني أحضر المحاضرات بس لأنه طالما مقالش حاجة تانية خلاص انا كدا مقصرتش، دا بجانب إن الطالب الجامعي الجديد بيبقى لسه بيستكشف العالم اللي حواليه دا فمكنش في تركيز على النقطة دي. أنهي نقطة؟
النقطة دي:
لحد ما كبرت بقى ونضجت وفهمت إن الدكاترة مش وحشيين زي ما كنت فاكر أو إن العالم مدين ليا وأكتشفت إن الإستحقاقية اللي جوايا خلتني أشوف دا ولما رجعت أشوف المشهد تاني لاقتني مجرد طفل فاكر إن العالم كله بيدور حواليه بس وإنها مش دونية إنك تكون لوحدك وعادي إن ميكونش في إهتمام ليك كإنك ال wonder kid وإن الواحد بيكبر لما بيبدأ يحمل المسئولية على نفسه أكتر من على الناس.
الطالب الجامعي المُستجد لازم يفهم ويعرف إن الحياة في علوم إرتجالية أكتر من المراحل اللي فاتت، مكان عشان تنجح فيه لازم يكون عندك قدر كويس من الإعتماد على النفس والمرونة، طالب العلم لازم يكون مرن جداً مبيخافش من الكم الضخم من المعلومات لازم يكون بيعرف يطنطط كويس، يعني لو المعلومة هتخليه يستنى الدكتور في مكتبه يروح وميخافش (أو ميكسلش لأنه مش متعود على كدا) أو يسئل معيد أو يبحث على الإنترنت أو ينزل المكتبة ويحط في دماغه إن مش دايماً هيلاقي المساعدة مش عشان الحياة صعبة أو وحشة زي ما نفسه هتقوله كدا. لأ، دا عشان المرحلة دي بتأهلك إنك تكون كبير وتكون مسئول بشكل مُختلف.
لو انا في سنة أولى وسمعت الكلام دا كنت هحس إن الموضوع صعب بس بعد ما اتخرجت لاقيت إن الكلام دا مُمتع وإن المسئولية والسعي في طلب العلم ليها نشوة خاصة كدا. شعور بينك وبين نفسك إن الطفل الصغير لم يعد صغيراً.
"!And in your mind you 'll say "I did it mom
في أولى وتانية ثانوي أو أي مرحلة قبل الجامعة كنت ممكن تعدي يومك وتعدي في المادة وخلاص والدنيا في التصحيح بتبقى أخف والرسوب نادراً، بس هنا في علوم مفيش فهلوة ومفيش حاجة أسمها هتعدي وخلاص (بالحب) لو محلتش كويس في الإمتحان أعرف إنك محلتش كويس ف الإمتحان :) ، يعني في الأغلب الحل اللي هتكتبه مش هتتجامل عليه وهتتحاسب كشخص مسؤول أكتر(إحنا أتفقنا خلاص إننا كبرنا ومش هنعيط بقى ومش هنشوف نفسنا نستحق أكتر من اللازم). ودي حاجات مش هتدركها إلا بعد الإمتحانات أو لما النتيجة تطلع.
عشان الصدمة بتبقى كبيرة بالذات لطالب طول حياته تقريباً مرسبش في مادة وكمان بينه وبين نفسه إنه شاطر دا انا طالب في علوم! فثقتك في نفسك ممكن تتدمر بعد أول نتيجة، فأبعد عن عقلية التسويف ومذاكرة ليلة الإمتحان وذاكر بذكاء مش بطلب منك تكون شخص خارق، أنت لو بس عملت الطبيعي والعادي هتنجح وتجيب تقدير كمان إن شاء الله.
خمس عشرة نصيحة أهمهم الثامنة:
1) أول ترم في مسيرتك الجامعية لازم تستمتع بيه لأنك هتكون أجمل الذكريات في الترم دا.
2) مش معنى إنك خلصت ثانوية إنك خلاص أنت كدا أرتاحت كما كان يُقال لنا من مدرسين الثانوية العامة و الشعارات التحفيزية الكذابة، فكر نفسك أول بأول إنك طالب علم وإنك مش جاي علوم تلعب أنت جاي عشان تـعمل فرق حقيقي لنفسك. " We Need Someone Who Can Take It To The Next Level"
3) متبقاش خجول أو خايف، لازم تمر بتجارب كتير في أول سنة عشان تفهم الدنيا بدري بدري.
4) حاول تتعلم صح ومتحفظش وأفتكر إنك مش في ثانوية هتحفظ وترمي الكلام دا! لازم تحب العلم وتعرف إزاي تتعلم صح وأبحث عن كورس "تعلم كيف تتعلم" https://rb.gy/nq588 5) حاول تقضي وقت في المكتبة مش عشان تقرأ من الكتب بس، عشان تذاكر هناك في هدوء لأن الجو هناك مُحفز على المذاكرة وسط شباب زيك بيذاكروا أدخل وهتفهمني.(أو دور على أي مكان رايق هادي في الكلية / الجامعة تعرف تتعلم فيه)
6) أتعلم تبحث لأن دي مهارة هتفيدك في أي مجال وفي مجال ال CS أكتر بكتيرررررررر.
7) أختار صحابك كويس جداً لأن دول في الأغلب اللي هيكموا معاك!
8) أبعد عن الحب.
10) متخافش تكون لوحدك.
11) أحتسب نية التعلم لله وحدة.
12) أبعد عن الأنشطة الطلابية ما عدا العلمية.
13) متخليش الكلية كل حياتك، حاول تلاقي هواية بس المهم متهملش الكلية عشان الرسوب في علوم أسهل من الحب.
14) لو هتركز على تقدير يبقى لازم تركز جداً على أول ترم.
15) متخلوش الدراسة يا شباب تخليكم تفوتوا الصلاة، مينفعش معياد الصلاة يفوتك وأظبط حياتك وتنظيمها على الصلاة سواء في البيت أو الكلية.
حاجة مهمة كمان:)
أستخدم مع نفسك كلمة التعلم بدل المذاكرة ليها آثر نفسي كبير صدقني :)
"واعلم أن ثغرك الصّغير هو ميدانك الكبير، فخُذه بقوَّةٍ ولا تلتفت."
تعليقات
إرسال تعليق